அக்கரைப்பற்று பதுர் பூம் போய்ஸ் விளையாட்டுக் கழகத்தின் 9ஆவது ஆண்டு நிறைவை முன்னிட்டு ஏற்பாடு செய்யப்பட்ட மின்னொளி மென்பந்து கிரிக்கெட் சுற்றுப் போட்டியில் சம்மாந்துறை எஸ்.எஸ்.சி விளையாட்டுக் கழகம் சம்பியன் கிண்ணத்தை சுவீகரித்து கொண்டது.
அம்பாறை மாவட்டத்திலுள்ள சுமார் 80 மேற்பட்ட முன்னணிக்கழகங்கள் பங்குகொண்ட இச்சுற்றுப் போட்டி 5 ஓவர்கள் மட்டுப்படுத்தப்பட்ட அணிக்கு 8 பேர் கொண்டதாக நடைபெற்றது.இறுதிப் போட்டிக்கு சம்மாந்துறை எஸ்.எஸ்.சி விளையாட்டுக் கழகமும், அட்டாளைச்சேனை தைக்கா நகர் எவர்டொப் விளையாட்டுக் கழகமும் தெரிவானது.
அக்கரைப்பற்று றிபிள் பி விளையாட்டுக் கழகத்தின் தலைவர் எம்.எச்.ஜிப்ரி தலைமையில் அக்கரைப்பற்று ட்ரிபில்பி மைதானத்தில் கடந்த சனிக்கிழமை (30ம் திகதி) இரவு நடைபெற்ற இந்நிகழ்வில் சுகாதார போசணை மற்றும் சுதேச வைத்தியத்துறை இராஜாங்க அமைச்சர் எம்.சி.பைசல் காசிம் பிரதம அதிதியாக கலந்து கொண்டார்.
இந்நிகழ்வில் முன்னாள் கிழக்கு மாகாண சபை உறுப்பினரும் சுகாதார இராஜாங்க அமைச்சரின் இணைப்பு செயலாளருமான ஏ.எல்.தவம் உட்பட தொழிலதிபர்கள், விளையாட்டு வீரர்கள்,பிரதேச முக்கியஸ்தர்கள் என பலரும் கலந்து கொண்டனர். இதன்போது சிறந்த பந்து வீச்சாளராக தைக்கா நகர் எவர்டொப் விளையாட்டுக் கழக வீரர் ஏ.றிஸாதும்,சிறந்த ஆட்டநாயகனாக சம்மாந்துறை விளையாட்டு கழகத்தின் வீரர் எம்.எம்.சிப்றாஸூம் விருதை பெற்றுக் கொண்டனர்.
சம்பியனான எஸ்.எஸ்.சி. விளையாட்டுக் கழகத்திற்கு 40 ஆயிரம் ரூபாய் காசோலையும் கிண்ணமும், இரண்டாம் இடத்தை பெற்ற தைக்கா நகர் எவர்டொப் விளையாட்டுக் கழகத்திற்கு 20ஆயிரம் ரூபாய் காசோலையும் வெற்றி கிண்ணமும், மூன்றாம் இடத்தை பெற்ற அட்டாளைச்சேனை சோபர் விளையாட்டுக் கழகத்திற்கு வெற்றி கிண்ணமும் பணப்பரிசும் அதிதிகளால் வழங்கி வைக்கப்பட்டதுடன் கழகத்தினால் பல்துறை சார்ந்தவர்களுக்கும் விருதுகளும் இதன்போது வழங்கி கௌரவிக்கப்பட்டமை குறிப்பிடத்தக்கது.
சவளக்கடை குறூப், ஒலுவில் கிழக்கு தினகரன் நிருபர்கள்
from tkn