காணால்போனோரின் உறவுகள் சங்கம் காட்டம்
நிமலராஜன் இன்று உயிருடன் இருந்திருந்தால், சுமந்திரனின் சதி முடிச்சுக்களை தனது பலம் வாய்ந்த எழுத்துக்களால் அவிழ்த்து அம்பலப்படுத்திருப்பார். ஊழல் செய்யும் தமிழ் எம்.பி.க்கள் பதவியில் இருக்கும் வரை, தமிழர்கள் தங்கள் அரசியல் தீர்வைப் பெற முடியாது என காணாமல் ஆக்கப்பட்டோரின் உறவுகள் சங்கத்தின் செயலாளர் கோ.ராஜ்குமார் தெரிவித்தார்.
படுகொலை செய்யப்பட்ட ஊடகவியலாளர் நிமலராஜனின் 21 வது ஆண்டு நினைவு நாளான நேற்று (செவ்வாய்க்கிழமை) வவுனியாவில் காணாமல் போனவர்களின் உறவினர்களினால் தொடர் போராட்டம் மேற்கொள்ளும் போராட்ட பந்தலில் அஞ்சலி செலுத்திவிட்டு ஊடகங்களுக்கு கருத்து தெரிவிக்கும் போதே அவர் இவ்வாறு தெரிவித்தார்.
அவர் மேலும் கருத்து தெரிவிக்கையில்,
காணாமல் ஆக்கப்பட்ட தமிழ் குழந்தைகளைக் கண்டுபிடிப்பதற்கான 1706 வது நாள் போராட்டம் இன்றும் தொடர்கிறது. தமிழ் பத்திரிகையாளர் நிமலராஜனின் 21 வது ஆண்டு படுகொலை நினைவு நாள் இன்று. நிமலராஜன் உயிருடன் இருந்திருந்தால், சுமந்திரனின் சதி முடிச்சுக்களை தனது பலம் வாய்ந்த எழுத்துக்களால் அவிழ்த்து அம்பலப்படுத்திருப்பார். ஊழல் செய்யும் தமிழ் எம்.பி.க்கள் பதவியில் இருக்கும் வரை, தமிழர்கள் தங்கள் அரசியல் தீர்வைப் பெற முடியாது.
பணம் பெறும் பெரும்பாலான தமிழ் எம்.பி.க்கள் ஊமையாக இருப்பது மோசமான விடயமாகும் . இது ஒட்டுமொத்த தமிழ் தலைமுறையும் பெரும்பான்மை இனத்தின் அடிமைகளாக மாற்றும்.
சிவாஜிலிங்கத்தின் ஒரு சில கொள்கையுடன் நாங்கள் ஒத்துப்போகவில்லை. ஆனாலும் தனக்கு எதிராக வழக்கு பதிவு செய்ய சிவாஜிலிங்கம் சுமந்திரனுக்கு விடுத்த கோரிக்கையை வரவேற்கிறோம்.
சிவாஜிலிங்கம் மீது அவதூறு வழக்கு தொடர சுமந்திரன் மறுக்கிறார். வழக்கைத் தாக்கல் செய்யத் தவறினால், சிவாஜிலிங்கம் ஊடகங்களுக்கு சொன்ன ஊழல் குற்றச்சாட்டை சுமந்திரன் ஏற்று கொள்கிறார் என்றே அர்த்தம்.
இந்த ஊழல் குற்றச்சாட்டை மறைக்க, அவர் வயலை உழத் தொடங்கினார், பின்னர் படகோட்டம் மற்றும் உரத்தைப் பற்றி பேசினார். தமிழ்நாட்டு தமிழர்களுக்கு எதிரான நடத்தப்படும் எந்தவொரு ஆர்ப்பாட்டத்தையும் நாங்கள் எதிர்க்கிறோம். 1987 ல் ஜே.ஆர். ஜெயவர்தன காலத்தில் தமிழர் தாயகம் முற்றுகையிடப்பட்டபோது தமிழ்நாடே எங்களுக்கு உணவு மற்றும் மருந்தைக் கொண்டு வந்தனர்.
ஈழத்துக்கும் தமிழகத்துக்கும் இடையிலுள்ள பிணைப்பை முறிப்பதற்கான சதியே இந்த இந்திய மீனவர் எதிர்ப்பு போராட்டம். போரின் போது, தமிழக மீனவர்கள் எங்களுக்கு மருந்து, எரிபொருள், உணவு, உடைகள் மற்றும் பிற அத்தியாவசிய பொருட்களை கொண்டு வந்து உதவினர் . ஈழத் தமிழர்களாகிய நாம் அவர்கள் செய்ததை மறக்கக் கூடாது. தமிழக மீனவர்களுக்கு எதிராக யாரேனும் ஆர்ப்பாட்டம் செய்தால் அதை நாம் கண்டிக்க வேண்டும். நாங்கள் தெற்கே மீன் பிடிக்க செல்வதில்லை. அதனால் முதலில் தென்பகுதி மீனவர்கள் எங்கள் பகுதியில் மீன் பிடிப்பதையே எதிர்க்கிறோம்.
தமிழர்களின் விடுதலைக்கான கொள்கையில் சுமந்திரன் இல்லை என்பதில் தமிழர்கள் கவனமாக இருக்க வேண்டும். கொழும்பு பணத்தில் தமிழர்களை வாங்க தரகராக அவர் செயல்படுகிறார் என்றார்.
ஓமந்தை விஷேட நிருபர்
from tkn