Header Ads

அசர்பைஜான்–ஆர்மேனியா இடையே இரண்டாவது நாளாக உக்கிர மோதல்

ஆர்மேனியா மற்றும் அசர்பைஜான் படைகள் இரண்டாவது நாளாக நேற்றும் உக்கிர மோதலில் ஈடுபட்டதோடு, கனரக பீரங்கிகளை பயன்படத்தியதாக இரு தரப்பும் பரஸ்பரம் குற்றம்சாட்டுகின்றன.

அசர்பைஜான் நாட்டுக்குள் இருக்கும் ஆனால் 2016 ஆம் ஆண்டு தொடக்கம் ஆர்மேனிய இனத்தினரின் கட்டுப்பாட்டில் உள்ள சர்ச்சைக்குரிய நகொர்னோ–கரபக் பிராந்தியம் தொடர்பிலேயே தற்போதைய மோதல் வெடித்துள்ளது.

இந்த மோதல்களில் மேலும் 15 துருப்புகள் கொல்லப்பட்டதாகவும் கடந்த ஞாயிறன்று இழந்த சில நிலங்களை மீட்டதாகவும் ஆர்மேனியா குறிப்பிட்டுள்ளது. அங்கு அசர்பைஜான் படைகள் கடும் பீரங்கி தாக்குதல் நடத்துவதாக அது குறிப்பிட்டுள்ளது.

டெர்டர் நகரின் மீது ஆர்மேனிய படை கடும் பீரங்கி தாக்குதல் நடத்தியது என்று அசர்பைஜான் பாதுகாப்பு அமைச்சு குறிப்பிட்டுள்ளது. இதனால் 26 பொதுமக்கள் காயமடைந்திருப்பதாக அது குறிப்பிட்டுள்ளது.

அசர்பைஜான் வான் மற்றும் பீராங்கி தாக்குதல்களை நடத்தியதில் தமது 31 படையினர் கொல்லப்பட்டு 100க்கும் அதிகமானவர்கள் காயமடைந்ததாக கொர்னோ–கரபக் ஆர்மேனிய பிரிவினைவாதிகள் குறிப்பிட்டுள்ளனர்.

இந்நிலையில் இரு நாடுகளும் பகுதி அளவான இராணுவக் குவிப்பு மற்றும் சில பகுதிகளில் இராணுவச் சட்டத்தை பிரகடனம் செய்துள்ளன.

இரண்டு முன்னாள் சோவியட் ஒன்றிய நாடுகளுக்கும் இடையே காகசஸ் மலைத் தொடரில் உள்ள இந்த பிராந்தியத்தை ஒட்டிய பிரச்சினை கடந்த மூன்று தசாப்தங்களுக்கும் மேலாக தீர்க்கப்படாமல் இருப்பதோடு அங்கு அடிக்கடி மோதல்களும் இடம்பெற்று வருகின்றன.

கடந்த ஜூலையில் இடம்பெற்ற எல்லை மோதல்களில் குறைந்தது 16 பேர் கொல்லப்பட்டனர். இதனால் அந்தப் பிராந்தியத்தை மீண்டும் கைப்பற்ற அழுத்தம் கொடுத்து அசர்பைஜான் தலைநகரில் மிகப் பெரிய ஆர்ப்பாட்டமும் இடம்பெற்றது.

காஸ்பியன் கடலில் இருந்து உலக சந்தைகளுக்கு எண்ணெய் மற்றும் இயற்கை வாயுவை விநியோகிக்கும் குழாய் பாதை தெற்கு காகசஸ் ஊடாகச் செல்வதால் இந்த பிராந்தியத்தில் ஏற்படும் பதற்றம் அந்த விநியோகத்தில் சிக்கலை ஏற்படுத்தும்.

இதில் அசர்பைஜானுக்கு ஆதரவு வெளியிட்டிருக்கும் துருக்கி ஜனாதிபதி ரிசப் தையிப் எர்துவான், “ஆக்கிரமிப்பு மற்றும் கொடுமைக்கு எதிராக உலகம் நிற்க வேண்டும்” என்று வலியுறுத்தியுள்ளார். முஸ்லிம் பெரும்பான்மை கொண்ட அசர்பைஜான் துருக்கியுடன் நெருக்கமான உறவை கொண்டுள்ளது.

கிறிஸ்தவர்களை பெரும்பான்மையாகக் கொண்ட ஆர்மேனியாவின் நெருங்கிய நட்பு நாடான ரஷ்யா, உடன் போர் நிறுத்தம் ஒன்றை கொண்டுவரவும் பேச்சுவார்த்தை மூலம் ஸ்திரத்தன்மையை ஏற்படுத்தவும் அழைப்பு விடுத்துள்ளது. ரஷ்யா தனது இராணுவத் தளத்தையும் ஆர்மீனியாவில் வைத்துள்ளது.

இரு தரப்பையும் அமைதி காக்கும்படி சீனா வலியுறுத்தியுள்ளது. இந்த வன்முறையை முடிவுக்குக் கொண்டுவர அமெரிக்கா முயற்சிக்கும் என்று அமெரிக்க ஜனாதிபதி டொனால் டிரம்ப் குறிப்பிட்டுள்ளார்.

எனினும் இந்த மோதலில் பிராந்திய சக்திகளும் தலையிடும் அச்சமும் தற்போது அதிகரித்துள்ளது.

Tue, 09/29/2020 - 06:00


from tkn

கருத்துகள் இல்லை

Blogger இயக்குவது.