இலங்கை - பங்களாதேஷ் அணிகள் மொதும் மூன்று போட்டிகள் கொண்ட இருதரப்பு ஒருநாள் தொடரில் முதல் போட்டி இன்று 26ஆம் 28ஆம் மற்றும் 31ஆம் திகதிகளில் கொழும்பு ஆர். பிரேமதாச சர்வதேச மைதானத்தில் நடைபெறுகின்றன.
இலங்கை மண்ணில் இரண்டு அணிகளும் ஆடிய ஒருநாள் போட்டிகளை எடுத்து நோக்கும் போது 19 போட்டிகளில் இலங்கை அணி 15 வெற்றிகளை பெற்றுள்ளது. மறுமுனையில் பங்களாதேஷ் அணி 2 வெற்றிகளை பெற்றுள்ளதோடு, இரண்டு அணிகளுக்கும் இடையிலான முடிவுகளற்ற 2 ஒருநாள் போட்டிகளும் இலங்கை மண்ணிலேயே இடம்பெற்றிருந்தன.
கடைசியாக, 2017ஆம் ஆண்டில் மூன்று போட்டிகள் கொண்ட ஒருநாள் தொடருக்காக இலங்கை வந்த பங்களாதேஷ் அணி குறித்த தொடரை, 1-1 என சமநிலை செய்திருந்தது. ஆனால், இலங்கை அணியினை இதுவரை ஒருநாள் தொடரொன்றில் தோற்கடிக்காத பங்களாதேஷ் அணி சிறந்த பதிவு ஒன்றை இம்முறை மேற்கொள்ள எதிர்பார்க்கும்.
இந்த ஒருநாள் தொடருக்கான இலங்கை அணியினை கவனிக்க முன்னர், பங்களாதேஷ் அணியுடனான ஒருநாள் தொடரின் முதல் போட்டியோடு இலங்கை அணியின் வேகப்பந்துவீச்சாளரான லசித் மாலிங்க ஒருநாள் போட்டிகளில் இருந்து ஓய்வு பெறுவது கிரிக்கெட் ரசிகர்களுக்கு பெரும் ஏமாற்றம் தரும் விடயமாக அமைந்திருக்கின்றது.
லசித் மாலிங்க ஓய்வு பெற்றுக் கொள்வதால் பங்களாதேஷ் அணியுடனான ஒருநாள் தொடரின் கடைசி இரண்டு போட்டிகளிலும் இலங்கை அணிக்கு பாரிய இழப்பு ஒன்று ஏற்பட்டிருக்கின்றது.
பங்களாதேஷ் அணியுடனான இந்த ஒருநாள் தொடருக்கு 22 பேர் அடங்கிய இலங்கை வீரர்கள் அணி அறிவிக்கப்பட்ட போதிலும், தற்போது அது 16 பேராக குறைக்கப்பட்டிருக்கின்றது.
தற்போதைய வீரர்கள்அணியில் இலங்கை அணியின் துடுப்பாட்டம் அதன் தலைவர் திமுத் கருணாரத்ன, குசல் ஜனித் பெரேரா மற்றும் அவிஷ்க பெர்னாந்து ஆகியோரினால் பலப்படுத்தப்படுகின்றது. இவர்களில் குசல் ஜனித் பெரேரா இந்த ஆண்டு இலங்கை அணிக்காக ஒருநாள் போட்டிகளில் அதிக ஓட்டங்கள் (463) பெற்ற வீரராக காணப்படுகின்றார்.
சிரேஷ்ட வீரர்களான அஞ்செலோ மெதிவ்ஸ், லஹிரு திரிமான்ன ஆகியோரிடம் இருந்தும் இலங்கை அணியின் துடுப்பாட்டத்துறை இந்த ஒருநாள் தொடரில் சிறந்த பங்களிப்பினை எதிர்பார்க்கின்றது. இதில் திரிமான்ன கடைசியாக விளையாடிய இரண்டு ஒருநாள் போட்டிகளிலும் இலங்கை அணியின் மத்திய வரிசையினை பலப்படுத்தியிருந்தது குறிப்பிடத்தக்கது. மறுமுனையில் அஞ்செலோ மெதிவ்ஸ் பங்களாதேஷ் அணிக்கு எதிராக 54.75 என்ற துடுப்பாட்ட சராசரியினை கொண்டிருக்கின்றார்.
தனஞ்சய டி சில்வா பகுதிநேர சுழல் பந்துவீச்சாளரகவும், துடுப்பாட்ட வீரராகவும் இலங்கை அணிக்கு பங்களிப்பு வழங்க காத்திருக்கின்றார். அதேநேரம், நீண்ட இடைவெளி ஒன்றின் பின்னர் ஒருநாள் அணியில் இணைந்திருக்கும் அகில தனன்ஞய இலங்கைத் தரப்பிற்கு தனது மாய சுழல் மூலம் நம்பிக்கை தருவார் என எதிர்பார்க்கப்படுகின்றது.
லசித் மாலிங்க இந்த ஒருநாள் தொடரில் ஒரு போட்டியில் மாத்திரம் விளையாடுவதனால் இலங்கை அணி, பங்களாதேஷ் அணியுடனான ஒருநாள் தொடரில் நுவன் பிரதீப்பை தமது பிரதான வேகப் பந்துவீச்சாளராக நம்பியிருக்கின்றது. நடைபெற்று முடிந்த உலகக் கிண்ணத் தொடரில் இலங்கை அணிக்காக சிறப்பாக பந்துவீசிய நுவன் பிரதீப் கசுன் ராஜித, இசுரு உதான மற்றும் லஹிரு குமார ஆகியோருடன் இலங்கை அணியின் வேகப்பந்துவீச்சுத்துறைக்கு பலம் சேர்க்கவுள்ளார்.
தமிம் இக்பாலுடன் பங்களாதேஷ் அணியின் துடுப்பாட்டத்துறை முஷ்பிகுர் ரஹீம், அனாமுல் ஹக், சௌம்யா சர்க்கார், மொஹமட் மிதுன் மற்றும் மஹ்மதுல்லா ஆகியோரினால் பலம் பெறுகின்றது.
பங்களாதேஷ் அணிக்கு சுழல்பந்து சகலதுறை வீரர்களாக மெஹிதி ஹஸன், சப்பீர் ரஹ்மான் மற்றும் மொசாதிக் ஹொஸைன் ஆகியோர் வலுச்சேர்க்கின்றனர்.
பங்களாதேஷ் அணியின் வேகப்பந்துவீச்சுத்துறைக்கு பெறுமதி சேர்க்க முஸ்தபிசுர் ரஹ்மான், தஸ்கின் அஹமட், ருபெல் ஹொசைன் மற்றும் பர்ஹாட் ரெசா ஆகியோர் காணப்படுகின்றனர். அதில் முஸ்தபிசுர் ரஹ்மான் நடைபெற்று முடிந்த உலகக் கிண்ணத் தொடரில் 20 விக்கெட்டுக்களை கைப்பற்றியிருந்தார். அதேவேளை பர்ஹாட் ரெசா 2011ஆம் ஆண்டுக்கு பின்னர் பங்களாதேஷ் அணிக்காக ஒருநாள் போட்டி ஒன்றில் ஆடும் சந்தர்ப்பத்தினை இலங்கை அணிக்கு எதிரான ஒருநாள் தொடரின் மூலமே பெற்றிருப்பது குறிப்பிடத்தக்கது.
இலங்கை மற்றும் பங்களாதேஷ் அணிகள் இடையிலான ஒருநாள் தொடரின் அனைத்துப் போட்டிகளும் கொழும்பு ஆர். பிரேமதாச மைதானத்தில் நடைபெறவுள்ளன. போட்டி நடைபெறும் இந்த மைதானத்தில் அதிக புற்கள் காணப்படுவதால் வேகப்பந்துவீச்சாளர்கள் இந்த ஒருநாள் தொடர் முழுவதும் ஆதிக்கம் செலுத்துவார்கள் என எதிர்பார்க்கப்படுகின்றது.
ஏ.ஆர். பரீத்
from tkn