அட்டாளைச்சேனை விசேட நிருபர்
தென்கிழக்குப் பல்கலைக்கழகத்திற்கும், மொரட்டுவ பல்கலைக்கழகத்திற்குமிடையிலான கிரிக்கெட் போட்டியில் தென்கிழக்குப் பல்கலைக்கழக அணி 29 ஓட்டங்களினால் வெற்றியீட்டியது.
மூன்று வருடங்களுக்கு ஒருமுறை இடம்பெறும் பல்கலைக்கழகங்களுக்கிடையிலான விளையாட்டுப் போட்டியில் ஒரு அங்கமான கிரிக்கெட் போட்டியில் தென்கிழக்குப் பல்கலைக்கழகத்திற்கும், மொரட்டுவ பல்கலைக்கழகத்திற்குமிடையிலான கிரிக்கெட் போட்டி அண்மையில் தென்கிழக்குப் பல்கலைக்கழக மைதானத்தில் இடம்பெற்றது.
நாணயச்சுழற்சியில் வெற்றி பெற்ற தென்கிழக்குப் பல்கலைக்கழக அணித்தலைவர் பத்திரண தமது அணி முதலில் துடுப்பெடுத்தாடுவதாக அறிவித்தார். இதன்படி முதலில் துடுப்பெடுத்தாடிய தென்கிழக்குப் பல்கலைக்கழக அணி 50 ஓவர்கள் முடிவில் 6 விக்கட்டுக்களை இழந்து 226 ஓட்டங்களைப் பெற்றுக்கொண்டது.
இதில் ஏ.எல்.நுபைல் அஹமட் ஆட்டமிழக்காமல் 100 ஓட்டங்களைப் பெற்றுக் கொண்டார். 135 பந்துகளை எதிர்கொண்ட நுபைல் 8 பவுண்டரிகளையும், ஒரு சிக்ஸரையும் விளாசினார்.
ஒனிலா ராஜபக்ஷ 42 ஓட்டங்களைப் பெற்றுக்கொடுத்தார். டீ.ஆர்.பாலசூரிய 25 ஓட்டங்களைப் பெற்றார்.
மொரட்டுவ பல்கலைக்கழக அணியின் சார்பில் சந்துல வெலிவிட்ட 8 ஓவர்கள் பந்துவீசி 51 ஓட்டங்களைக் கொடுத்து 2 விக்கட்டுக்களையும், துமிந்த திஸாநாயக்க 7 ஓவர்கள் பந்துவீசி 19 ஓட்டங்களைக் கொடுத்து 2 விக்கட்டுக்களையும் கைப்பற்றினர்.
வெற்றி பெறுவதற்கு 227 ஓட்டங்களைப் பெறத் துடுப்பெடுத்தாடிய மொரட்டுவ பல்கலைக்கழக அணியினர் 44.1 ஓவர்களில் சகல விக்கட்டுக்களையும் இழந்து 197 ஓட்டங்களைப் பெற்றுக்கொண்டனர்.
இதன்மூலம் தென்கிழக்குப் பல்கலைக்கழக அணி 29 ஓட்டங்களினால் வெற்றி பெற்றது. மொரட்டுவ பல்கலைக்கழக அணியின் சாரிபில் சுரங்க விக்ரமசிங்க 42 ஓட்டங்களையும், துமிந்த திஸாநாயக்க 39 ஓட்டங்களையும், ராகல் பெர்ணாண்டோ 35 ஓட்டங்களையும் பெற்றுக்கொண்டனர்.
தென்கிழக்குப் பல்கலைக்கழக அணி யின் சார்பில் ஏ.எச்.எம்.ஆர்.தேனுவர 10 ஓவர்கள் பந்துவீசி 34 ஓட்டங்களைக் கொடுத்து 4 விக்கட்டுக்களையும்,எம்.ஆர்.டி.பண்டார 10 ஓவர்கள் பந்துவீசி 33 ஓட்டங்களைக் கொடுத்து 2 விக்கட்டுக்கழைளையும் கைப்பற்றினர்.
இப்போட்டியில் வெற்றி பெற்ற தென்கிழக்குப் பல்கலைக்கழக அணி அடுத்த சுற்றுக் தெரிவாகியுள்ளது.
from tkn